Joan zen ostegunean bukatu genituen eskualdeka egin ditugun bilerak. Guztira bost bilera izan dira eta Koordinadoraren bileretara orain arte etorri ez diren zenbait eskoletako gurasoek hartu dute parte. Honako hauek dira bileretara etorritakoak: Amoroto, Ea, Gautegiz-Arteaga, Ispaster; Gatika, Laukiz, Lemoiz; Areatza, Arrankudiaga; Artzentales; Atxondo, Aulesti, Mallabia eta Munitibar. Beraz, lehen helburua beteta.
Bileretan hitz egindakoaz ondokoak nabarmenduko genituzke.

• Bizkaiko Eskola Txikien Guraso Elkarteen Koordinadora eratzea ideia ona izan da eta zabaltzen eta sendotzen joateko ahalegina egiteak merezi du.

• Sarea egituratzen joateko, eskualdeka lan egitea aproposa ikusten da. Eskualdeko guraso elkarteen arteko harremana sendotzea interesgarria da elkarren berri zehatzagoa izan eta elkarrekin jarduerak egiteko. Gainera, Koordinadoraren bileretan eskualde guztiak ordezkatuak baldin badaude, informazioa eta eztabaida guraso elkarte gehiagotara zabaldu ahal izango da eskualdeko bileren bidez.

• Eraikinak txiki gelditu dira hainbat eskoletan eta eskola handitzeko edota eskola berria egiteko proiektuak onartzeko arazo handiak daude.

• Catering enpresen janaria onartzera presionatuta sentitzen dira hainbat eskola, bertako produktuak erabili beharrean.

• Jantokiko langileen ratioak kalkulatzeko umeak hiru taldetan sailkatzeak eta talde bakoitzean kopuru minimoa behar izateak kalte egiten digu.

• Garraioarekin ere arazo desberdinak daude: nahiz eta 2 km baino gertuago bizi, oinez joateko baldintza egokirik ez, eskolara goizegi (ordu bete lehenago) heltzea, nahiz eta autobusa bertatik igaro garraio eskubiderik ez izatea,…

• Eskolak zabaltzeko edo zikloak zabaltzeko traba handiak daude.

• Gure blogaren berri eman eta erabiltzera animatu genituen eskolak.

Hurrengo Koordinadoraren bilera Lakuako Eskola Txikien Batzordea abenduan bildu eta gero egingo dugu. Ordurako, eskualdeetako bileretara etorri ez diren guraso elkarteekin harremanetan jarri eta informazioa zabaltzeko ahalegina egingo da eskualde bakoitzean.
Besterik, ez. Poliki-poliki, baina ba goaz.

No Comments »

Areatzako eskolako haurrak urriaren 29an gaztainak biltzen joan ginen gure herriko inguruko parajetara. Aurreko astean zehar eskolan bertan gaztanei buruzko testutxo bat landu genuen: Gaztainak gure arbasoen elikaduraz izan duen garrantzia nabarmenduz eta zelan bildu eta gordetzen ziren aipatzen ere. Halaber; astelehenean urriaren 29a, arrastiko zazpietatik aurrera udaletxeko arkupetan gaztainak erre eta Areatzako aitite-amamak ixtorioak kontatzen zizkiguten bitartean jan genituen.

No Comments »

Bizkaiko Eskola Txikien Guraso Elkarteen Koordinadoran eskualdekako bilerak antolatzea pentsatu dugu, guztiok etortzeko aukera izan eta elkar ezagutza areagotzeko. Bilera hauek arratsaldeko 6etan izango dira ondoren aipatzen diren data eta lekuetan, eta gai ordenean agertzen diren gaiak jorratuko ditugu.

Egutegia

• Azaroak 2; Gautegiz-Arteagan; Amoroto, Aulesti, Berriatua, Busturia, Gautegiz-Arteaga, Ispaster, Munitibar, Muxika, Ea

• Azaroak 9; Gatikan; Bakio, Gatika, Laukariz, Laukiz, Lemoiz

• Azaroak 16; Areatzan; Areatza, Arrankudiaga, Artea, Otxandio, Zeanuri, Zeberio

• Azaroak 23; Artzentalesen; Artzentales, Gordexola, La Arboleda, Turtzios

• Azaroak 30; Mallabian; Atxondo, Etxebarria, Mallabia

Gai ordena

• Bizkaiko guraso Elkarteen Koordinadoraren aurkezpena

• Sarearen antolaketa

• Eskolen egoera, kezka eta beharrak

Dagokizuen egunean ezin bazarete etorri, beste bilera batera etor zaitezkete.
Animatu eta parte hartu!

No Comments »

Urriaren 4an Bizkaiko Eskola Txikien Guraso Elkarteen Koordinadoraren bilera izan genuen BIGEn. Bertaratu zirenen artean Artzentales, Ispaster, Laukiz, Lemoiz, Munitibar eta Muxikako eskoletako guraso elkarteen ordezkariak egon ziren, BIGEko Ana eta Palomarekin batera.

• Hasteko, ekainean Durangon izandako Eskola Txikien II Topaketei buruz hitz egin genuen, esperientzia positiboa izan dela azpimarratuz eta datorren urtean hobetu beharrekoak aipatuz. Topaketen laburpena blog honetan ere zabaldu genuen bere garaian, beraz, bertan duzu informazio gehiago.

• Bigarrenik, ikasturte honetarako egitasmoetaz hitz egin genuen. Lakuako Eskola Txikien Batzorde Nagusia ez da oraindik bildu, baina Batzordeburu berria izango den Ikastetxe Zuzendariak agindu digu urrian bilduko garela. Bertan gaur egungo arautegiak eskola txikietan nolako eragina duen aztertu nahi da, egin beharreko aldaketak proposatzeko. Arautegia eskola handietan pentsatuz egiten da, eta eskola txikiei egokitzea ez da erraza izaten, gehienetan salbuespenak izaten garelarik. Adibide moduan ondoko arautegiak aipatu ziren: jantokia, gutxiengo baldintzen dekretoa eta garraioa.

• Bestalde, Bizkaiko eskola txikien arteko elkar ezagutza eta harremana sendotzen joateko hainbat egitasmo proposatu ziren, eskola txangoak herri txikietara egitea eta koordinadoraren bilera sorta bat eskualdeka egitea, besteak beste.

• Azkenik, elkar ezagutza eta harremana sendotzeko asmotan martxan jarri dugun blogaren aurkezpena egin zigun Palomak. Eskola txiki guztiak erregistratuta zaudete dagoeneko eta laster jasoko duzue eskolan zuen ekarpenak plazaratzeko behar dituzuen datuak eta orientabideak. Informazio horrekin batera, inkesta txiki bat jasoko duzue, gure datu basea eguneratzeko.

Datozen egunetan eskualdeka egingo diren bileren egutegia finkatuko dugu, eskola txikien sarea eratzen joateko asmoz.

No Comments »

Lemoizko eskolako 25 guraso eta ume Beintza-Labaiengo aterpetxean izan gara asteburu hau pasatzen, aukera politak eskaintzen dituen inguru zoragarrian.

Aterpetxea bera ederra da, Beintzako frontoi ondoan kokatua, umeek jolasean lasai-lasai aritzeko modukoa. Gainera, Mikelek emandako tratua, Idoiak prestatutako janariaren goxotasunaren parekoa izan da, bata zein bestea detailez beteak, egonaldia erabat atsegina eginez.
Esan bezala inguruak aukera politak eskaintzen ditu. Larunbat goizean Bertizko Jaurerriaren Natur Parkera joan ginen bertako lorategia eta ibilbidetxo bat egitera. Ume txikientzako oso aproposa. Bertan bazkaldu ostean, Zubietako errota Ekomuseoa bisitatu genuen, errota martxan ikusteaz gain herriko inauteriei eta beste ohitura batzuei buruzko bideoa ikusteko aukera izan genuelarik.