Datorren ostegunean, ekainaren 25ean, Durangon izango diren Eskola Txikien IV Topaketetan parte hartzeko inprimaki hau bete behar duzue.

Categories: Orokorra
No Comments »

Ekainaren 14an Gipuzkoako Eskola Txikien jaia ospatuko da Berrobin. Urtero bezala Eskola Txikietako ume eta gurasoak primeran pasatzeko aukera ederra izango dugu Tolosaldeako herri txiki honetan. Egitaraua eta informazio osoa hemen duzue.

Animatu zaitezte parte hartzera!

Categories: Berriak
No Comments »

Eskola Txikien III Topaketak datorren asteazkenean, ekainaren 25ean, izango dira Durangon. Eskola Txikietako irakasle eta gurasoekin bat egin eta esperientzia desberdinak ezagutzeko aukera ederra dugu. Parte hartzeko Matrikula inprimakia bete eta bertan azaltzen den moduan bidali. Epea ekainaren 20an bukatzen da.
Animatu!

Categories: Koordinadora
No Comments »

Artzentalesen Martxoaren 10ean egiteko zen bilera hilaren 31n izango da ordu eta leku berean.

Categories: Koordinadora
No Comments »

Hezkuntza Sailak eskola mapa berria egingo du ikasturte honetan, aurrekoa egin zenetik 11 urte igaro direlako eta tarte horretan hainbat aldaketa gertatu direlako. Prozesua orain dela aste batzuk hasi zen hezkuntza eragileei eztabaidarako zenbait dokumentu aurkeztuz ekarpenak jasotzeko asmoz. Asmo hau legebiltzarrean ere aurkeztu zen urriaren 29an eta hurrengo eguneko hedabideetan oihartzuna izan zuen. Prozesu hau ez dago itxita, azaro eta abenduan ekarpenak aurkezteko aukera egongo da azken txostena izan aurretik.
Eskola mapak eragin zuzena du eskoletan, baita Eskola Txikietan ere. Beraz, dokumentuak aztertzea beharrezkoa dugu gure iritzia gauzatu eta ekarpenak egin ahal izateko. Aipatutako dokumentuak Hezkuntza Saileko webgunean dituzue: ikastetxeak eta ikasketak/eskola mapa  eta eztabaidarako aproposena ‘EAEko eskola mapa egiteko irizpideei buruzko proposamena’ da. Bertan, besteak beste, Eskola Txikien ezaugarriak zehazten dira, ratioak eta gutxieneko ikasle kopuruekin batera.
Azaroaren 12an izango dugun bileran, gai honi buruz hitz egingo dugu eta gure arteko eztabaidarako bideak ezartzen saiatuko gara.

Categories: Koordinadora
No Comments »

Deialdia egiteko orduan izandako arazoengatik, azaroaren 5ean egiteko zen bilera, azaroaren 12ra atzeratu dugu. Bilera 6etan izango da BIGEren egoitzan (Ronda kalea 27, 1. ezk, Bilbao) ondoko gaiak jorratzeko:

Categories: Koordinadora, Uncategorized
No Comments »

Ikasturte bukaera bertan dugunez, Bizkaiko Eskola Txikien Guraso Elkarteen bilera egitea pentsatu dugu. Bilera Ekainaren 26an, asteartean, arratsaldeko 6etan BIGEren egoitzan (Ronda kalea 27, 1. Ezk, Bilbo) izango da ondoko gaiak aztertzeko:

• Lakuako Eskola Txikien Batzordeko bilerari buruzko informazioa

• Hurrengo Batzordeko bilerarako proposamenak

• Bizkaiko Guraso Elkartearen koordinadorak aurten egindakoaren balantzea

• Datorren ikasturterako plana

Zuen partehartzeak garrantzi handia du, gure koordinadoraren lana aurrera eramateko. Ezin baduzue bilerara etorri, eskualdeko guraso elkarteekin koordinatu zaitezte, eskualde bakoitzetik norbait etor dadin. Dena den onena, bertan izatea da, beraz, animatu eta etorri!

Categories: Koordinadora
No Comments »

Martxoaren 15ean, arratsaldeko 6.30etan Bizkaiko Eskola Txikietako Guraso Elkarteen Koordinadoraren bilera izango dugu BIGEn (Ronda 27, 1. ezk). Besteak beste, ondoko gaiak aztertuko ditugu:

• Lakuako bileren berri (Abenduan izandakoa eta Martxoaren 20n izango duguna)
• Eskualdekako antolamendua
• Eskola Txikien definizioa
• Lakuako Eskola Txikien Batzordean aurkezteko proposamenak

Animatu eta parte hartu, eta ezin bazarete etorri antolatu zaitezte eskualdeko norbait etor dadin.

Categories: Koordinadora
No Comments »

Abenduaren 14an bildu zen Lakuako Eskola Txikien Batzordea. Dakizuenez, Batzorde honetan Hezkuntza Saileko arduradun eta teknikariekin batera, Eskola Txikietako irakasle eta gurasoen ordezkariak hartzen dugu parte. Orain arteko arduraduna Hezkuntza Berriztatzeko Zuzendaria izan bada, hemendik aurrera Ikastetxeen Zuzendaria izango da Batzordeburua, eta bilera honetan Batzordearen egin beharrak eta lan egiteko dinamika zehaztu zituen Batzordeburu berriak:

• Batzordea hiru hilabetean behin bilduko da gutxienez eta aldez aurretik, gai ordenarekin batera bileran aztertuko diren gaiei buruzko dokumentazio eta proposamenak banatuko dizkigute. Beraz, Batzordea bildu aurretik gure artean eztabaidatzeko aukera izango dugu.

• Eskola Txikien definiziotik abiatuz, diagnostikoa egin nahi da, gaur egungo egoera ondo ezagutuz etorkizunari begira plangintza egin ahal izateko.

• Eskolen arazo konkretu eta premiazkoak ere aztertuko dira.

Batzordeburuak gai askori buruzko iritzia azaldu zuen, baina eztabaida hurrengo bileretarako utzi genuen. Dena den ondoko ideiak azpimarratuko nituzke.

• Txikia izateko gehienez 6 unitate izan behar du eskolak.

• Hiru lurraldeetarako politika bakarra izan behar du.

• Bizkaiko Eskola Txiki askok handitzen ari dira eta instalazio arazoak izango dituzte etorkizunean. Horri aurre egiteko udalen inplikazioa behar da.

• Pertsonalaren formazioa bultzatu behar da. Topaketak antolatzen segitu behar dugu.

Hurrengo bileran jorratu nahi diren gaiak definizioa, diagnostikoa eta formazioa dira. Dokumentazioa heldu bezain laster gure Koordinadoraren bilera deituko dugu, gaiak eztabaidatu eta Lakuako Batzordera iritzi orokorra eraman ahal izateko.

Categories: Koordinadora
No Comments »

Joan zen ostegunean bukatu genituen eskualdeka egin ditugun bilerak. Guztira bost bilera izan dira eta Koordinadoraren bileretara orain arte etorri ez diren zenbait eskoletako gurasoek hartu dute parte. Honako hauek dira bileretara etorritakoak: Amoroto, Ea, Gautegiz-Arteaga, Ispaster; Gatika, Laukiz, Lemoiz; Areatza, Arrankudiaga; Artzentales; Atxondo, Aulesti, Mallabia eta Munitibar. Beraz, lehen helburua beteta.
Bileretan hitz egindakoaz ondokoak nabarmenduko genituzke.

• Bizkaiko Eskola Txikien Guraso Elkarteen Koordinadora eratzea ideia ona izan da eta zabaltzen eta sendotzen joateko ahalegina egiteak merezi du.

• Sarea egituratzen joateko, eskualdeka lan egitea aproposa ikusten da. Eskualdeko guraso elkarteen arteko harremana sendotzea interesgarria da elkarren berri zehatzagoa izan eta elkarrekin jarduerak egiteko. Gainera, Koordinadoraren bileretan eskualde guztiak ordezkatuak baldin badaude, informazioa eta eztabaida guraso elkarte gehiagotara zabaldu ahal izango da eskualdeko bileren bidez.

• Eraikinak txiki gelditu dira hainbat eskoletan eta eskola handitzeko edota eskola berria egiteko proiektuak onartzeko arazo handiak daude.

• Catering enpresen janaria onartzera presionatuta sentitzen dira hainbat eskola, bertako produktuak erabili beharrean.

• Jantokiko langileen ratioak kalkulatzeko umeak hiru taldetan sailkatzeak eta talde bakoitzean kopuru minimoa behar izateak kalte egiten digu.

• Garraioarekin ere arazo desberdinak daude: nahiz eta 2 km baino gertuago bizi, oinez joateko baldintza egokirik ez, eskolara goizegi (ordu bete lehenago) heltzea, nahiz eta autobusa bertatik igaro garraio eskubiderik ez izatea,…

• Eskolak zabaltzeko edo zikloak zabaltzeko traba handiak daude.

• Gure blogaren berri eman eta erabiltzera animatu genituen eskolak.

Hurrengo Koordinadoraren bilera Lakuako Eskola Txikien Batzordea abenduan bildu eta gero egingo dugu. Ordurako, eskualdeetako bileretara etorri ez diren guraso elkarteekin harremanetan jarri eta informazioa zabaltzeko ahalegina egingo da eskualde bakoitzean.
Besterik, ez. Poliki-poliki, baina ba goaz.

Categories: Koordinadora
No Comments »