Ea Zenbait hilabeteko atzerapenarekin, bere lehenengo zortzi ikasleak hartu zituen atzo auzo horretako eskola berriak.

Gorane Barrenetxea

Atzokoa oso egun pozgarria izan zen eatarrentzat. Izan ere, zenbait hilabeteko atzerapenarekin, Natxituko eskola berriak bere ateak ireki zituen atzo. Duela bi aste Eusko Jaurlaritzako Hezkuntza saileko ikuskatzaileak egon ziren bertan hezkuntza zentroari oniritzia emateko. Baiezkoa eman, eta Udalak eta Jaurlaritzak eskola hainbat arinen zabaltzeko egin beharreko izapideak egin zituzten berehala. Horri esker, atzo posible izan zen Natxituko eskola berria martxan jartzea.

Ikasturtea Natxituko antzinako maisuaren etxean hasi zuten 2 eta 4 urte arteko Eako zortzi umek eta atzo, lehenengoz, Natxituko eskola berrian hartu zituzten klaseak. «Umeak eskola berrira etortzeko desiratzen egon dira. Hala ere, aldaketa oso gogorra izan ez dadin, aste honetan eta beharbada hurrengoan ere, ikasturte hasieratik izan duten irakaslea gurekin egongo da eskolan. Modu horretan, haurrak egoera berrira hobeto moldatuko dira», azaldu du Amaia Orbe Natxituko eskolako irakasleak.

Haur Hezkuntzako zentro batek beharrezko dituen zerbitzu guztiez hornituta dago Natxituko eskola. Horrela, ikasleentzako bi gela, psikomotrizitatea lantzeko gela berezia, jantokia, irakasleentzako bulegoa eta batzar lekua ditu.

Eskolaren antolaketa eta proiektua

Eskolak zortzi ikasle hartuko ditu ikasturte honetan: bi urteko hiru ume, hiru urteko hiru eta beste bi lau urtekoak. «Oraindik hasi baino ez gara egin, beraz, eskolan aurrera eramango den programa eta proiektua azaltzeko goizegi da», esan du Orbek. «Gure asmoa, ume taldearen arabera, ziklo ezberdinak bereiztea da, hau da, 3, 4 eta 5 urteko zikloak, hain zuzen ere. Iniziatiba hori gurasoekin adostu beharreko zerbait da. Izan ere, Natxituko eskola herriaren proiektua da eta gurasoen parte-hartzea ezinbestekoa izan da».

Eskolako irakaslearen arabera, atzokoa pozik egoteko eguna zen eatar guztientzat, oso positiboa den zerbait lortu dutelako. «Kontuan hartu behar da eskola urte luzeetan eskatu izan den zerbitzua dela, eta azkenean guztion parte-hartzearekin eta borrokarekin lortu egin da».

Guztira, bederatzi hilabete izan dira beharrezkoak Natxituko eskola zaharren eraikina behar bezalako ekipamenduz eta zerbitzuz hornitzeko.

Eskola zaharberritzeko lanetan 1,2 milioi euroko inbertsioa egin du Udalak.

############

«Eskola ezinbestekoa da, herritar denak batzen dituelako»

Amaia Orbe ðNatxituko eskolako irakaslea

Natxituko eskola irekitzeko data hainbat aldiz atzeratu ostean, atzotik aurrera dagoeneko martxan da hezkuntza zentroa.

G. Barrenetxea

Amaia Orbe (Ea, 1982) natxituarra Eako auzo horretan atzo ireki zuten eskolan da irakasle. Bere ustez, «eskola herriko motore bilakatuko da».

Nola ikusi duzu Natxituko eskola berria?

Oso ondo dago. Beharrezkoak diren ekipamendu guztiak ditu. Hala ere, argi dago hasierak ez direla errazak izaten eta prozesu bat beharko dugula eskolaren funtzionamendua antolatzeko.

Natxituko eskolak umeekin gauza politak egiteko aukera emango al du?

Bai, erabat. Natxitukoa eskola txikien baitan sartuta dago, eta horiek ematen duten zerbitzua oso ezberdina da. Aurten zortzi ume baino ez dira egongo eskolan, beraz, taldean gehiago zentratzeko eta herrian gehiago txertatzeko aukera ematen du.

Zenbat irakasle egongo zarete lanean?

Guztira bi irakasle egongo gara: ingelesekoa eta ni, sukaldari bat eta jantokiko begiralea.

Zenbat urterekin hasiko dira haurrak ingelesa ikasten?

Ingelesezko klaseak 3 urtetik aurrera emango dira.

Ezaugarri hauek dituen eskola beharrezkoa al zen Ean?

Bai, erabat, herrian bizi nahi dugunontzat ezinbesteko zerbitzua baita. Izan ere, hemen herri bat eraiki nahi badugu, eskola izatea beharrezkoa da, eskolak batzen gaituelako. Gainera, Natxituko eskola Udalaren, herriaren eta gurasoen apustu oso garrantzitsua izan da eta betiere proiektu herritarra izan behar du.

############